“Zəfər” respublika yaradıcılıq festival- müsabiqəsinin qaliblərinin mükafatlandırılması mərasimi keçirilib

 Dekabrın 24-də Şirvan-Salyan Regional Təhsil İdarəsinin inzibati binasında "Zəfər" respublika yaradıcılıq festival-müsabiqəsinin qaliblərinin mükafatlandırılma mərasimi keçirilmişdir. Tədbirdə Şirvan-Salyan Regional Təhsil İdarəsinin müdiri vəzifəsini icra edən Vüqar Dadaşov, təhsil idarəsinin əməkdaşı və  şagirdlər iştirak etmişlər.

Vüqar Dadaşov çıxışında, festival-müsabiqənin şagirdlərin yaradıcılıq potensialını üzə çıxarmaq və inkişaf etdirmək baxımından böyük əhəmiyyət kəsb etdiyini vurğulamış, belə müsabiqələrin istedadlı gənclərin aşkar olunması və onların bacarıqlarının daha geniş auditoriyaya təqdim olunmasında mühüm rol oynadığını qeyd etmişdir. O, həmçinin şagirdlərə təhsildə və şəxsi inkişaflarında yeni-yeni uğurlar arzulamışdır.

Mərasimdə iştirak edən şagirdlərə Elm və Təhsil Nazirliyinin Fəxri Fərmanları və hədiyyələri təqdim olunmuşdur. "Zəfər" respublika yaradıcılıq festival-müsabiqəsinin final mərhələsində müxtəlif istiqamətlər üzrə 21 nəfər şagird Şirvan-Salyan Regional Təhsil İdarəsini təmsil etmişdir. Bunlardan 1 nəfər I yerə, 6 nəfər II yerə, 2 nəfər isə III yerə layiq görülmüşdür.

Qeyd edək ki, festival-müsabiqənin keçirilməsində əsas məqsəd milli mədəniyyət və incəsənətin təbliği, uşaqları vətənpərvərlik və adət-ənənələrə hörmət ruhunda tərbiyə etmək, Vətən müharibəsində şəhid olmuş qəhrəmanlarımızın əziz xatirəsini ehtiramla anmaq və Azərbaycan ordusunun Vətən müharibəsində qazandığı zəfəri gənc nəsil arasında daha geniş şəkildə təbliğ etmək olmuşdur.

Şagirdlərimizi təbrik edir,  uğurlar arzu edirik.

Mənbə: https://salyan.edu.gov.az/az/page/13123/76207