“Bir qəsəbənin üç Milli Qəhrəmanı” filminin təqdimatı keçirildi

 

25 iyun 2022-ci il tarixində Neftçala şəhərindəki Heydər Əliyev Mərkəzində "Kür-Xəzər” Xeyriyyə İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə hazırladığı “Bir qəsəbənin üç Milli Qəhrəmanı” filminin təqdimat mərasimi keçirildi. Mərasimdə Neftçala rayon İcra Hakimiyətinin başçısı Mirhəsən Seyidov, “Kür-Xəzər” Xeyriyyə İctimai Birliyinin sədri Akif Kərimov, Milli Qəhrəmanların, şəhid ailələrinin valideynləri, ailə üzvləri, Neftçala rayon ictimaiyyətinin nümayəndələri iştirak ediridilər. Qeyd edək ki, film Neftçala rayonunun Həsənabad qəsəbəsində anadan olmuş, Birinci Qarabağ müharibəsində -1992-ci ildə şəhidlik zirvəsinə yüksəlmiş Zakir Məcidovun, 2016-cı ilin aprel döyüşlərində şəhid olmuş Samid İmanovun, Vətən Müharibəsində canını vətən uğrunda fəda etmiş Camal İsmayılovun qəhrəmanlıqlarla dolu həyat yolundan bəhs edir. Filmin ideya müəllifi və layihə rəhbəri Akif Kərimov, quruluşçu rejissor Bəhram Yaqublu, operator Nicat Nağızadə, montajçı Zaur Babayev, redaktor Böyükağa Mikayıllıdır. Filmin mətni Cəlal Məmmədov tərəfindən səsləndirilib. Təqdimat iştirakçıları şəhidlərin məzarlarını, ulu öndər Heydər Əliyevin abidəsini ziyarət edib, gül-çiçək dəstələri düzdülər. Mərasimdə öncə film nümayiş olundu. Nümayişdən sonra mərasimin aparıcısı Elnar Məmmədli çıxış etmək üçün iştirakçıları bir-bir tribunaya dəvət etdi. Neftçala rayon İcra Hakimiyyətinin başçısı Mirhəsən Seyidov, "Kür-Xəzər” Xeyriyyə İctimai Birliyinin sədri Akif Kərimov, şəhid Milli Qəhrəman Samid İmanovun atası Gülağa İmanov, Samid İmanovun həyat yoldaşı Badam İmanova, Vətən Müharibəsi Qəhrəmanı Camal İsmayılovun atası Vidadi İsmayılov, Camal İsmayılovun anası Filarə xanım, filologiya üzrə fəlsəfə doktorları Tariyel Abbaslı, Tahir Şirvanlı və başqaları qəhrəmanların keçdikləri ömür yoluna nəzər saldılar. Qeyd etdilər ki, yüksək peşəkarlıqla ərsəyə gətirilən film gənc nəslə vətənpərvərlik ruhunun aşılanmasında müstəsna əhəmiyyətə malikdir. “Kür-Xəzər” Xeyriyyə İctimai Birliyi də məhz bu amili nəzərə alaraq belə bir layihə ilə çıxış edib. Vətənpərlik mövzusunda layihələrə hər zaman diqqət yetirən Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi də layihəni dəstəkləyərək onun icra olunmasına şərait yaradıb. Çıxış edənlər onu da vurğuladılar ki, 2020-ci ilin sentyabr ayında Azərbaycan Respublikasının Prezidenti, Ali Baş Komandan cənab İlham Əliyev ölkədə qismən səfərbərlik haqqında qanun imzaladıqdan sonra neftçalalı gənclər vətənpərvərlik ruhu nümayiş etdirərək böyük həvəslə ordu sıralarına yazıldılar. Döyüşə yollanan hər bir neftçalalı gənc torpaqlarımızın erməni işğalından azad olunması uğrunda mərdliklə mübarizə apardılar, şəhid, qazi oldular, adlarını vətənin qəhrəman oğulları sırasına yazdılar. Sonda vurğulandı ki, film YouTube kanalı, eləcə də sosial şəbəkələr vasitəsilə yayımlanacaq. Gənclərin vətənpərvərlik mövzusunda filmləri izləməsi olduqca vacib məsələdir.

Mənbə: http://edungo.org/xeberler/108-bir-qesebenin-uc-milli-qehremani-filminin-teqdimati-kecirildi.html