5 oktyabr Müəllimlər Günüdür

Razılaşın ki, müəllim və məktəb insan üçün böyük əhəmiyyət kəsb edir, çünki həyatımızda istifadə etdiyimiz bilik, bacarıq və vərdişlərin əksəriyyətini məhz məktəb illərində qazanmışıq.

   Hər nəsil gələcəyin məktəbini özünəməxsus şəkildə təsəvvür edir. İndiyə qədər məktəb gil lövhələrdən müasir ağıllı lövhələrə, açıq hava fəaliyyətindən geniş və çoxfunksiyalı sinif otaqlarınadək çox uzun bir tarixi yol keçmişdir. Gələcəyin təhsili yenilikçi və daha çox rəqəmsal texnologiyalar və vasitələr üzərində qurulacaqdır. Media mühiti və internet mənbələri tədris prosesinin daha çevik və daha fərdi olmasına imkan yaradır və yaradacaqdır. Bəlkə də siniflərin yerini qismən interaktiv təhsil platformaları, təhsil sosial şəbəkələri və veb səhifələr tutacaqdır. XX əsrin insanları bunu ancaq arzulaya bilərdilər. Əlbəttə gələcəkdə məktəblərin necə olması haqqında xəyal qurmaq yaxşıdır, lakin dərk etmək lazımdır ki, bu gələcək,  hazırda müəllim masasında oturan biz müəllimlərdən asılıdır. Xəyalları gerçəkləşdirməkdən isə qorxmayın. Müəllim və tərbiyəçi hər bir insanın həyatında vacib insandır.

   Hörmətli həmkarlar sizin sayənizdə uşaq nəinki lazımi biliklər alır, həm də vətənpərvərlik, dövlətə və dövlətçiliyə sevgi, xeyirxahlıq, dostluq, məqsədyönlülük öyrənir, həyatı və mənəvi dəyərləri qavrayır. Sizin hər bir gününüz gənc nəslin qəlbinə, bilik zirvəsinə aparan yoldur. Sağlam, yaradıcı və aktiv olun! Şagirdlərinizin minnətdarlığı sizlər üçün layiqli bir mükafat olsun.

                                                            Bayramınız mübarək hörmətli həmkarlar!