Həyat kitabına necə yaxşı bir qeyd yazmaq olar

Mixael Laytman yazır...

İsraildə yəhudi Yeni ili olan Roş xa Şana yaxınlaşır. Ənənəvi olaraq, bu gün bir-birimizə Həyat kitabına yaxşı bir qeyd yazmağı arzulayırıq. Bütün insan əməllərinin göydə qeyd olunduğuna və hər kəsin günahkarların deyil, salehlərin kitabına daxil olmağa çalışdığına inanılır. Buna görə də bu Yeni il təbriki tam olaraq belə səslənir.

Bəs bu arzunun gerçəkləşməsi üçün nə etməliyik?

Roş xa Şana duasında bu sözlər var: “Səni unutmayan insan xoşbəxtdir”. Bəs nəyi unutmamalıyıq? Bir-birimizə sevgi və ürəklərin birliyinə nail olmaq ehtiyacını. Axı Tövratın əsas qaydası qonşunu özünü sevdiyin kimi sevməkdir.

Roş xa-Şanada bir-birimizə xoş bir il arzuladığımız üçün onun bal kimi mehriban və şirin olmasını diləyirik. Beləliklə, bayram süfrəsində bala batırılmış alma yeyirik. Alma “düşmənin” - aramızdakı bölünmənin qədim simvoludur. Onu “şirinləşdirmək” - birlik ilə çatları düzəltmək üçün bala batırırıq.

Digər vacib yemək isə “quyruq yox, baş” olmaq istəyimizi simvolizə edən balıq başıdır. Axı, həyatımızı özümüz müəyyən etmək istəyirik, onların bizi eqoist məqsədlərə sürükləməsinə imkan verməmək istəyirik.

Bu həyatın bizə niyə verildiyini, varlığımızın məqsədinin nə olduğunu və onu məna ilə necə doldurmağı, sevgi və bütün kainatla müsbət əlaqə vasitəsilə faydalı və mənalı etməyi anlamaq istəyirik.  Bunu etmək üçün “quyruq” yox, “baş” olmalıyıq. Nar həm də bayramın bir simvoludur, onun toxumları ruhumuzun hissələrini təmsil edir. Ənənəyə görə, ruh 613 hissədən ibarətdir və biz onları tək, ortaq bir ruha - Adam Rişona birləşdirərək düzəltməliyik.

Qəlblərimizi bir-birinə yaxınlaşdıraraq, biz daha çox Ali Qüvvəyə, Yaradana bənzəyəcəyik. Bu, insanın bu dünyada əsas vəzifəsidir - Yaradanı kəşf etmək və Onunla birləşmək. Əgər keçən il bunu edə bilməmişiksə, yeni ildə buna nail olmaq istəyirik. İlkin eqoist keyfiyyətlərimiz əvəzinə, Yaradanın keyfiyyətlərini - sevgi və bəxşiş əldə etmək istəyirik.

Roş xa Şananın dərin mənası budur: bir-birimizə yaxınlaşmaqla Yaradana yaxınlaşırıq və Onu kainatı idarə edən əsas qüvvə kimi kəşf edirik. Əgər bunu səmimi qəlbdən arzulasaq, “həyatı seçin” çağırışına əməl etsək, bu arzu Həyat kitabına həkk olunacaq. Bu, əsl Yeni il - insanın mənəvi doğuluş anı olacaq.

Mənbə: https://www.michaellaitman.com/ru/articles/kak-poluchit-dobruyu-zapis-v-knige-zhizni/

Rus dilindən tərcümə:

Əsədov Seyyub Əsəd oğlu-Şirvan şəhər T. Bağırov adına 11 №-li tam orta ümumtəhsil məktəbinin  tarix müəllimi, “Ən yaxşı müəllim” müsabiqəsinin (2015-ci il), “Elektron Təhsil” Respublika Müsabiqəsi, “Təhsildə ən yaxşı İnternet resursları” nominasiyası qalibi (2017-ci il), Respublika “Pedaqoji Mühazirələr”inin (2003-cü il III dərəcəli Diplom və 2019-cu il Tərifnamə) təltifçisi, Təhsildə inkişaf və innovasiyalar üzrə IV qrant müsabiqəsinin (2020) qalibi (“V-XI siniflərdə tarix fənninin tədrisi metodikası” adlı metodik vəsait müəllifi).