Oxumaq istəyənlər üçün: xəyalımda etdiyim çıxış

Hörmətli tədbir iştirakçıları!

Özümü təqdim edim - Əsədov Seyyub Əsəd oğlu, Şirvan şəhər T. Bağırov adına 11 №-li tam orta məktəbin tarix müəllimi, “Ən yaxşı müəllim” müsabiqəsinin (2015-ci il), “Elektron Təhsil” Respublika Müsabiqəsi, “Təhsildə ən yaxşı İnternet resursları” nominasiyası qalibi (2017-ci il), Respublika “Pedaqoji Mühazirələr”inin (2003-cü il III dərəcəli Diplom və 2019-cu il Tərifnamə) təltifçisi, Təhsildə inkişaf və innovasiyalar üzrə IV qrant müsabiqəsinin (2020) qalibi (“V-XI siniflərdə tarix fənninin tədrisi metodikası” adlı metodik vəsait müəllifi). Beynəlxalq və respublika elmi-pedaqoji  jurnallarda elmi, tarixi və pedaqoji məqalələrim dərc olunur.

Çıxışımı bu sözlərlə başlamaq istəyirəm:                    

- “Mən müəllimdən yüksək ad tanımıram!” – Ümummilli Lider Heydər Əliyev.

 “Hər bir millətin tərəqqi qapısı onun məktəbidir.” – Nəriman Nərimanov.

Əziz dostlar!

Bu il – 2025-ci il, ölkəmizdə Konstitusiya və Suverenlik ilidir.

Konstitusiyamız – dövlətimizin dayağı, hüquqlarımızın və azadlıqlarımızın təminatçısıdır.

Məktəbimizin tarixi hər birimiz üçün qürur mənbəyidir:

11 nömrəli məktəb 1962-ci ildə ibtidai məktəb kimi fəaliyyətə başlayıb,1968-ci ildə 8 illik məktəbə çevrilib, 1984-cü ildə isə tam orta məktəb kimi bu binaya köçmüşdür.

1993-cü ildən məktəbimiz Azərbaycan Respublikasının Milli Qəhrəmanı Tahir Bağırovun adını daşıyır. Onun adı və xatirəsi bu gün də şagirdlərimizə vətənpərvərlik ruhu aşılayır. Bundan başqa məktəbimizin şəhid məzunlarını da hər birimiz heç vaxt yaddan çıxarmarıq.

İllər ərzində məktəbimiz böyük uğurlara imza atmışdır:

2005-ci ildə qrant layihəsinin qalibi olmuş, 2009-2010-cu dərs ilində cənab Prezident İlham Əliyevin sərəncamı ilə “50 ən yaxşı məktəb”dən biri seçilmişdir,

2006-2007-ci illərdə Dünya Bankının dəstəyi ilə əsaslı təmir olunmuşdur.

2025-ci ildə isə yenidən əsaslı təmirdən sonra istifadəyə verilir.

Ən böyük qürur mənbəyimiz isə – öz işinə sadiq, vətənpərvər pedaqoji kollektivimizdir!

Hörmətli tədbir iştirakçıları!

Bu xoş günü bizlərə yaşadan Azərbaycan Respublikasının Prezidenti cənab İlham Əliyevə, Birinci vitse-prezident Mehriban xanım Əliyevaya, Təhsil Nazirliyinə, Şirvan Şəhər İcra Hakimiyyətinə və Regional Təhsil İdarəsinə – bütün şagirdlər, müəllimlər və valideynlər adından dərin təşəkkürümü bildirirəm.

Bu gündən etibarən məktəbimiz yeni bir tarix yazmağa başlayır!

DİQQƏTİNİZ  ÜÇÜN TƏŞƏKKÜR EDİRƏM. 

 

Yazının müəllifi: Əsədov Seyyub Əsəd oğlu