NASA: Yeni yanacaq texnologiyası ilə Marsa cəmi 45 günə gedilə bilər

 NASA insanları Marsa daha sürətli çatdırmaq üçün nüvə termal raket texnologiyasını sınaqdan keçirib.

“Azərbaycan müəllimi” newsnationnow.com-a istinadən xəbər verir ki, NASA-nın Marşal Kosmik Uçuş Mərkəzində yeni reaktor yanacağı uğurla sınaqdan keçirilib. Bu texnologiya insanları Marsa aparma müddətini xeyli azalda bilər. Nüvə termal raket (NTP) texnologiyası Marsa hazırkı altı aylıq uçuş müddətini cəmi 45 günə endirə bilər. Bu barədə NASA ilə birlikdə NTP sisteminin yanacağını hazırlayan General Atomics Electromagnetic Systems (GA-EMS) şirkəti məlumat verib. GA-EMS-in prezidenti Skot Forni bildirib ki, bu sınaqlar NTP reaktorları üçün yanacaq dizaynının uğurla nümayiş etdirilməsi baxımından mühüm mərhələdir. Onun sözlərinə görə, bu texnologiyanın gələcəkdə kosmosun dərinliklərinə və Aya təhlükəsiz səfərlər üçün faydalı olacaq. NASA-nın bu sınaqları həm də yanacağın kosmosun ekstremal şəraitinə dözümlülüyünü yoxlamaq məqsədi daşıyıb. GA-EMS-in nüvə texnologiyaları üzrə vitse-prezidenti Kristina Bak isə bildirib ki, NASA-nın Marşal Mərkəzində ilk dəfə olaraq xüsusi bir test qurğusunda yanacağın yüksək temperaturda sabitliyini uğurla yoxlamaq mümkün olub. Qeyd edək ki, indiyədək heç bir insan Marsa ayaq basmayıb. Lakin robotlar artıq 25 ildən çoxdur ki, Qırmızı planetin səthini araşdırır. Bunun əsas səbəbi Marsın Yerə uzaq olmasıdır – ortalama 140 milyon mil (225 milyon km) məsafədə yerləşir. Bütün çətinliklərə baxmayaraq, NASA 2030-cu illərdə Marsa astronavt göndərməyi planlaşdırır və bu yeni texnologiya bu məqsədə çatmağı sürətləndirə bilər.

Mənbə: https://bit.ly/4jO573m