Biz eyni anda üç kainatda yaşayırıq

 

Adi anlayışımızda bizi əhatə edən hər şey kainat adlanır. Kiçicik zərif kəpənəkdən tutmuş uzaq nəhəng qalaktikaya qədər bütün maddi dünyamız bura daxildir. Biz də bu kainatın bir hissəsiyik. Bəs kainat təkcə ətrafımızda deyil, həm də içimizdədirsə onda necə? Bəs bir neçə belə kainat varsa necə?

Gəlin bunu anlamağa çalışaq.

Reallıq kainatı. Burada hər şey sadədir - ətrafımızda olan, görünən kainat, kosmos, fiziki reallıq olanlar.

Düşüncə kainatı. Məlumat, məntiqi zəncirlər, fərziyyələr, nəticələr, mühakimələr, baxışlar və dəyərlər sistemi - bütün bunlar insanın yaşadığı düşüncə kainatının  tərkib hissələridir. Fərdi bir insanın beynində baş verənlər reallıq kainatı ilə tamamilə əlaqəsiz ola bilər. Düşünmək hər birimizin özümüz üçün yaratdığı daxili dünyamızdır. Onu yaradır, təkmilləşdirir və tamamlayırıq. Hər birimizin başqalarından fərqli olaraq öz unikal kainatımız vardır, burada özümüzün yaradıcıyıq. Çətin həyat vəziyyətlərində bəziləri reallıqdan bu kainata qaçırlar.

Yuxular kainatı. Bu, yuxarıda qeyd edilən ilk iki kainatın qarşılaşdığı kainatdır- reallıq və düşüncə: Ancaq bu, sadəcə görüş yeri deyil. Yuxuların da digər kainatlar kimi öz komponentləri vardır. Onun öz obyektləri, onlar arasında əlaqələri, öz məntiqi və mənası var. Hər zaman insan yuxuların mənasını başa düşə bilmir. Belə hesab edilir ki, yuxular real həyatda əvvəllər yaşanmış hadisələr əsasında və ya bəzi emosional stimullara reaksiya kimi formalaşır. Amma bu çox sadə bir izahdır və reallığa uyğun gəlmir. Çox vaxt insanlar yuxuda real həyatlarında olanı və ya olmayanı görürlər. Heç vaxt yaşamadıqları vəziyyətlər və süjetlər, hətta nə planetimizdə, nə də başqa yerdə mümkün olmayan vəziyyətləri görürlər. Mütəxəssislər əmindirlər ki, gələcəkdə yuxular kainatı daha başa düşülən, proqnozlaşdırıla bilən və idarə olunan hala gələcəkdir. İnsanlar yuxularında nəyə baxacaqlarını seçə biləcəklər. Yuxunun xatirələri fraqmentli və qeyri-müəyyən deyil, real dünyada keçmiş bir günün xatirəsi kimi canlı, təfərrüatlı olacaq.  Proqnozlara görə, bu cür texnologiyaların yaranması yaxın onillikdə mümkün olacaqdır. Ona görə də belə nəticə çıxır ki, biz bir deyil, eyni anda üç kainatda yaşayırıq. Aydındır ki, onların hər biri bir növ digər ikisi ilə bağlıdır. Məsələn, yaranmış bir fikir (düşüncə, təfəkkür kainatı) yuxunun nəticəsi ola bilər. Yuxu kainatı hansısa obyektin və ya işin (reallıq kainatı) yaranmasına səbəb ola bilər.

Varlıq üçbucağı üç kainatdır, bunlardan birincisi insanı (reallıq, gerçəklik kainatı), ikincisi isə insanın özü tərəfindən yaradılmışdır (təfəkkür kainatı), üçüncüsü isə reallıq və təfəkkürün qarşılıqlı təsirinin nəticəsidir ki, onu yuxular (xəyallar)  kainatı adlandırırıq. Bu varlıq üçbucağı stabil deyil, daim hərəkətdə və dəyişmədədir. Buna görə də hər gün eyni cür düşünmürük. Biz hər gecə eyni yuxuları görmürük və bu gün real dünyada baş verənlər dünən baş verənlərlə uyğun gəlmir. Bundan əlavə, varlıq üçbucağı daim böyüyür. Biz bilirik ki, həqiqi kainat genişlənir. Məkanın özü fiziki olaraq genişlənir. Hətta planetimizdə biz öz varlığımızı artırır, yeni şəhərlər və müəssisələr tikirik. Biz böyüyürük. Düşüncə kainatı yeni ideyalar və biliklər yaradır, onlar arasında əlaqə yaradır. Bilik və məlumatların miqdarı hər gün sürətlə artır. Bu gün biz ətrafımızdakı dünya haqqında bir neçə onilliklər əvvəlkindən daha çox şey bilirik. Xəyallar kainatı hər dəfə bir insana reallıq və düşüncənin qarşılıqlı təsirinin nəticəsini göstərir, bəzən yeni həllər təklif edərək oara özünü əlavə edir.

Biz insanın eyni vaxtda yerləşdiyi üç fərqli, lakin çox əlaqəli sonsuz dünyada yaşayırıq. Bu dünyaların sayının daha çox olması tamamilə mümkündür. Sadəcə olaraq, indiki inkişaf mərhələsində biz onları hələ dərk edə, görə bilmirik.

Mənbə: https://bit.ly/43BMjf0

Rus dilindən tərcümə etdi:

Əsədov Seyyub Əsəd oğlu - Şirvan şəhər T. Bağırov adına 11 №-li tam orta məktəbin tarix müəllimi, “Ən yaxşı müəllim” müsabiqəsinin (2015-ci il), “Elektron Təhsil” Respublika Müsabiqəsi, “Təhsildə ən yaxşı İnternet resursları” nominasiyası qalibi (2017-ci il), Respublika “Pedaqoji Mühazirələr”inin (2003-cü il III dərəcəli Diplom və 2019-cu il Tərifnamə) təltifçisi, Təhsildə inkişaf və innovasiyalar üzrə IV qrant müsabiqəsinin (2020) qalibi (“V-XI siniflərdə tarix fənninin tədrisi metodikası” adlı metodik vəsait müəllifi), Azərbaycan Respublikası “Təhsil Şurası” İB-nin İdarə Heyətinin üzvü