NUHÇIXAN İnformasiya Agentliyi xəbər verir ki, Kəngərli
rayon mərkəzindəki Dövlət Bayrağı Meydanında Müstəqillik Günü münasibətilə
“İstiqlalımızın bayramı” adlı tədbir keçirilib. Kəngərli Rayon İcra Hakimiyyəti
və Təhsil Şöbəsinin birgə təşkilatçılığı ilə keçirilən tədbirdə əvvəlcə
meydanda vüqarla dalğalanan üçrəngli bayrağımızın fonunda Azərbaycan
Respublikasının Dövlət Himni səsləndirilib. Sonra Rayon Təhsil Şöbəsinin
aparıcı məsləhətçisi Şəfəq Camallı “Azadlığa gedən yol”, İcra Hakimiyyətinin əməkdaşı
İmran Hüseynov “Xalqımızın şərəf salnaməsi”, Qıvraq qəsəbə tam orta məktəbinin
tarix müəllimi Yunis Ələkbərov “Müstəqillik tariximiz” mövzularında çıxış ediblər.
Çıxışlarda qeyd olunub ki, 1918-ci il mayın 28-də Şərqdə ilk demokratik dövlət
quruluşu kimi yaranan Azərbaycan Xalq Cümhuriyyəti xalqımızın müstəqillik
tarixinin başlanğıcı olmaqla milli dövlətçilik salnaməsini müstəsna dərəcədə zənginləşdirib.
1991-ci ilin oktyabr ayında Azərbaycan xalqı öz müstəqilliyini bərpa etdi və
ulu öndər Heydər Əliyevin liderliyi ilə bu müstəqilliyi qoruyub saxlaya bildi.
Azərbaycan xalqı 28 May Gününü hər il təntənə ilə qeyd edir. Tədbirdə Kəngərli
rayon ümumtəhsil məktəblərinin şagirdləri vətənpərvərlik mövzusunda şeirləri bədii
qiraət edib, Qıvraq qəsəbə körpələr evi-uşaq bağçasının balaca fidanları
“Bayraq” rəqsi təqdim ediblər.
Mənbə:
UNESCO Beynəlxalq Mərkəzinin nəzdində fəaliyyət göstərən Beynəlxalq Ədəbiyyat və Jurnalistika Akademiyası (МАЛiЖ) 