ŞƏMKİRDƏ RESPUBLİKA TƏHSİL ŞURASININ FİLİALI TƏSİS OLUNDU

Təsis toplantısından öncə Respublika Təhsil Şurasının üzvləri Şəmkir şəhərində Şəhidlər xiyabanını və Xocalı soyqırımı abidəsini ziyarət etdilər, şəhidlərin məzarı üzərinə gül dəstələri qoydular.

Şəmkir müəllimləri Təhsil Şurası ilə həmişə əməkdaşlıq ediblər...

Təsis toplantısı Şəmkir şəhər Cahangir Rüstəmov adına tam orta məktəbdə keçirildi. Tədbiri giriş sözü ilə açan Şəmkir rayon təhsil şöbəsinin müdir müavini Hafiz Pənahov qonaqları təqdim etdi. Söylədi ki, bu tədbirlərin hər biri müəllimlər üçün öyrədici mahiyyət daşıyıb. Müəllimlər bu təşkilatın tədbirlərinə böyük maraqla qoşulublar. Çünki keçirilən tədbirlərin hər biri öyrədici mahiyyət daşımaqla bərabər, həm də müəllimlərin arzu və istəkləri səviyyəsində hazırlanıb, onların maraqları nəzərə alınaraq təşkil olunub. Hafiz Pənahov vurğuladı ki, Respublika Təhsil Şurasının konfrans, seminar və təlimlərinə Şəmkir rayonundan olan müəllimlər, təhsil işçiləri də həvəslə qoşulublar. O, Təhsil Şurasının həyata keçirdiyi “Beynəlxalq təcrübə mübadiləsi təlim keyfiyyətini yüksəldən vasitə kimi” mövzusunda beynəlxalq konfransa diqqət yönəldərək, özünün də bu layihə çərçivəsində Gürcüstanda keçirilən beynəlxalq konfransa qoşulduğunu dilə gətirdi. Şuraya gələcək fəaliyyətində uğurlar dilədi.

Təhsil Şurasının missiyası...

Respublika Təhsil Şurasının sədri Samir Mehdizadə rəhbərlik etdiyi təşkilatın keçdiyi yola, illər ərzində təşkil olunan tədbirlərə nəzər saldı. Qeyd etdi ki, Təhsil Şurasının beynəlxalq və respublika miqyaslı tədbirləri zaman-zaman müəllimlərin marağı ilə qarşılanıb. Bu tədbirlərin təşkil olunmasında müəllimlər özləri də fəal iştirak ediblər. Samir Mehdizadə Təhsil Şurasının beynəlxalq əlaqələrinə diqqət çəkərək söylədi ki, biz bu gün Almaniyanın, Çexiyanın, Polşanın, Ukraynanın, Quzey Kıbrısın universitetləri, Milli Elmlər Akademiyaları, məktəbəqədər, orta təhsil müəssisələri, yaradıcılıq akademiyaları, inkluziv resurs mərkəzləri, eləcə də ayrı-ayrılıqda təhsil mütəxəssisləri, müəllimlər, alimlər, nəhayət UNECKO kimi nüfuzlu bir təşkilatla əməkdaşlıq edirik. Biz bu əməkdaşlıqları, apardığımız təcrübə mübadilələrini pedaqoji mühitin təkmilləşməsinə, müəllimlərimizin metodiki hazırlığının yüksəldilməsinə yönəltməklə, Azərbaycanın təhsil sisteminə öz töhfəmizi verməyə çalışırıq. S.Mehdizadə daha sonra Təhsil Şurasının yeni təsis etdiyi qəzet və jurnallardan, tədqiqat mərkəzlərindən bəhs etdi. Müəllimləri bu mərkəzlərlə əməkdaşlığa çağırdı. Samir Mehdizadə qeyd etdi ki, Respublika Təhsil Şurası tədqiqatçı müəllimləri, təhsil və pedaqogika sahəsində araşdırma aparan alimləri həvəsləndirmək üçün “Akademik Mehdi Mehdizadə” medalı və “Akademik Mehdi Mehdizadə” diplomu təsis edib.  Vurğuladı ki, Təhsil Şurasının missiyası həm də müəllimlərin pedaqoji fəaliyyəti ilə yanaşı, tədqiqatçılıq səriştələrinin də inkişafına zəmin hazırlamaqdır. Biz əminik ki, müəllimlərimiz Şuranın “Analitik təhlil və tədqiqat mərkəzi”, “Akademik Mehdi Mehdizadənin pedaqoji irsinin tədqiqi mərkəzi”, “Yanuş Korçak Akademiyası”, “Təhsil müəssissələrinin ictimai akkreditasiyası mərkəzi”, "Peşəkar inkişaf və karyera mərkəzi", “Dərsliklərin monitorinqi mərkəzi” ilə, eləcə də Şuranın qəzet və jurnalları ilə daha geniş əməkdaşlıq etməkdə maraqlı olacaqlar.

Respublika Təhsil Şurasının fəaliyyətinin əsas istiqamətləri...

Respublika Təhsil Şurasının katibi Böyükağa Mikayıllı qeyd etdi ki, Şuranın fəaliyyətində istər əvvəllər, istərsə də bu gün maarifçilik işlərinə xüsusi önəm verilib. B.Mikayıllı vurğuladı ki, müasir dövrdə Təhsil Şurasının sıraları ölkəmizin nüfuzlu alimləri, qabaqcıl müəllimləri ilə daha da genişlənir. Bu gün ölkəmizin bütün məktəblərində qabaqcıl, öz işinin ustası olan müəllimlər var. Təhsil Şurasının fəaliyyətinin əsas istiqamətlərindən biri də məhz həmin müəllimləri cəmiyyətə təqdim etmək, onların elmi, pedaqoji, metodiki ustalığından digər müəllimlərin də bəhrələnməsinə nail olmaqdır. “Biz Şəmkirdən olan qabaqcıl müəllimləri də Şura ilə əməkdaşlığa dəvət edirik” deyə, B.Mikayıllı vurğuladı. Onu da qeyd etdi ki, Təhsil Şurasının nəzdində yaranan mərkəzlər müəllimlərin fəal ictimai işə qoşulmalarına, pedaqoji, metodiki tədqiqatlarda yaxından iştirak etmələrinə şərait yaradacaq. B.Mikayıllı daha sonra Təhsil Şurasının xətti ilə aparılan tədqiqatlarının nəticəsi olaraq ərsəyə gətirilən  “Yaradıcılıq axtarışları”, “Müasir dərs yeni yanaşmalar”, “Dünyanın Kıbrısı, Kıbrısın dünyası” (Azərbaycan, ingilis, türk dillərində), “Yanuş Korçak” (Azərbaycan, ingilis, rus, Ukrayna dillərində), “Dünyanın təhsil mənzərəsi” (Dünyanın nüfuzlu universitetlərinin və təhsil sistemlərinin təhlili), “Sinqapur təhsilinin fəlsəfəsi” kitablarından bəhs etdi. 

Təsis toplantısında Şəmkir rayon təhsil şöbəsinin müdir müavini Hafiz Pənahov Respublika Təhsil Şurasının Şəmkir filialının rəhbəri təyin olundu.

Respublika Təhsil Şurasının Mətbuat və İctimaiyyətlə Əlaqələr Mərkəzi

 

Mənbə: https://www.facebook.com/permalink.php?story_fbid=129543015948381&id=108741758028507