20 yaşında Sovet İttifaqı Qəhrəmanı adını qazanan azərbaycanlı: Əhmədov Cəmil Məmməd oğlu

Faşizmə qarşı mübarizədə həlak olan tağım komandiri, qvardiya leytenantı Əhmədov Cəmil Məmməd oğlunu tanıyaq.

Cəmil Məmməd oğlu Əhmədov (1924, Azərbaycan SSR, Cəbrayıl kəndi-               2 sentyabr 1944, Polşa) - İkinci Dünya müharibəsi iştirakçısı, 1-ci Belorus Cəbhəsinin 28-ci Ordusunun 55-ci qvardiya Atıcı Diviziyasının 168-ci qvardiya Atıcı Alayının tağım komandiri, qvardiya leytenantı, Sovet İttifaqı Qəhrəmanı (24 mart 1945).

Müharibə başlayanda Cəmil 1941-ci ilin iyun ayında hərbi  komissarlığa müraciət etdi. Lakin cəmi 17 yaşı olduğu üçün orduya qəbul edilmədi. Gənc oğlan 1942-ci ilin mart ayında Sovet Ordusu sıralarına çağırıldı. 1943-cü ildə Orconikidze Hərbi Piyada Məktəbini bitirdi və tağım komandiri kimi cəbhəyə göndərildi. Cəmil Əhmədov ilk dəfə 1943-cü ilin payızında Şimali Qafqazda döyüşlərə qatıldı. Ukraynanın azad edilməsi uğrunda döyüşlərdə göstərdiyi cəsarət və igidliyə görə kiçik leytenant Cəmil Əhmədov Qırmızı Ulduz ordeni ilə təltif edildi.

Qvardiya leytenantı Əhmədov 1944-cü ilin yayında Belarusun azad edilməsi zamanı tağım komandiri kimi fərqləndi. 23 iyun 1944-cü ildə Əhmədovun tağımı alman-faşist piyada dəstəsinin bir qrupunu pusquya salaraq məhv etdi. Növbəti gün Qomel bölgəsindəki Pariçi kəndi yaxınlığındakı düşmən istehkamına hücum zamanı Əhmədov səngər döyüşündə şəxsən 10-dan çox düşmən əsgərini məhv etdi. Cəmil başından yaralansa da, tağıma komandirlik etməyə davam etdi.

İyunun 25-də Əhmədovun tağımı Belarusun Malın kəndi yaxınlığında Berezina çayını keçən ilk tağım oldu. Əsas qüvvə gələnə qədər tağım 10 saat ərzində atəş dəstəyi göstərməyə davam etdi. Əhmədov ikinci dəfə yaralandı və ona hərbi hospitala getmək  təklif edildi. Lakin Cəmil imtina edərək dedi: “Əllərim pulemyot tutduğu müddətcə, ürəyim döyündüyü müddətcə döyüş meydanını tərk etməyəcəyəm”.

Əhmədov üçüncü yarasını iyunun 26-da Belarusun Malın kəndinə hücum zamanı ayağından alsa da, yaralanmasına baxmayaraq, bölməsinin irəliləməsinə rəhbərlik etməyə davam etdi. Qan itkisindən huşunu itirən Əhmədov gecə ərzində özünə gəldi və bir neçə saat sürünərək özünkülərə çatmağı bacardı. Tib işçiləri onu xəstəxanaya çatdırdılar. 28-ci Ordunun qoşunları üçün 27 iyul 1944-cü il tarixli 35/n nömrəli əmrlə qvardiya leytenantı Cəmil Əhmədov Aleksandr Nevski ordeni ilə təltif edildi.

Həkimlərin bütün cəhdlərinə baxmayaraq, Qvardiya leytenantı Cəmil Əhmədov 2 sentyabr 1944-cü ildə döyüşdə aldığı yaralardan vəfat etdi.

Alman-faşist işğalçılarına qarşı mübarizənin ön cəbhəsində komandanlığın döyüş tapşırıqlarını nümunəvi şəkildə yerinə yetirdiyinə və bu zaman göstərilən cəsarət və qəhrəmanlığa görə SSRİ Ali Soveti Rəyasət Heyətinin 24 mart 1945-ci il tarixli fərmanı ilə qvardiya leytenantı Əhmədov Cəmil Məmməd oğluna Sovet İttifaqı Qəhrəmanı (ölümündən sonra) adı verildi.

Cəmil Əhmədov Varşavada sovet əsgərləri qəbiristanlığında dəfn olunub.

O, həmçinin Lenin ordeni (23 mart 1945), Aleksandr Nevski ordeni (27 iyul 1944) və Qırmızı Ulduz ordeni (19 fevral 1944) ilə də təltif edilib.

Cəbrayılda onun adına küçə və məktəb olmuşdur, eləcə də qəhrəmanın büstü qoyulmuşdu (P.S. tərcüməçidən: Hazırda küçə, məktəb və büst haqqında dəqiq məlumatım yoxdur).

Mənbə: https://www.facebook.com/20531316728/posts/10154009990506729/

Rus-dilindən tərcümə:

Əsədov Seyyub Əsəd oğlu-Şirvan şəhər T. Bağırov adına 11 №-li tam orta ümumtəhsil məktəbinin  tarix müəllimi, “Ən yaxşı müəllim” müsabiqəsinin (2015-ci il), “Elektron Təhsil” Respublika Müsabiqəsi, “Təhsildə ən yaxşı İnternet resursları” nominasiyası qalibi (2017-ci il), Respublika “Pedaqoji Mühazirələr”inin (2003-cü il III dərəcəli Diplom və 2019-cu il Tərifnamə) təltifçisi, Təhsildə inkişaf və innovasiyalar üzrə IV qrant müsabiqəsinin (2020) qalibi (“V-XI siniflərdə tarix fənninin tədrisi metodikası” adlı metodik vəsait müəllifi).