ŞİRVAN
ŞƏHƏRİNİN 60 İLLİYİ QARŞISINDA
ŞİRVAN
(ƏLİ BAYRAMLI) ŞƏHƏRİNİN ZİYALILARI
Akif
Abbasov, pedaqogika elmləri doktoru, professor, əməkdar müəllim
MƏNALI
ÖMRÜN İŞIĞINDA
Ömür
qısa da ola bilər, uzun da. Lakin bu, bir həqiqətdir ki, həyat heç kimə əbədi
verilmir. Geniş yayılmış bir kəlam var: “İstəmədən doğuluruq, təəccüblə
yaşayırıq, həsrətlə ölürük”. Həmin sözlərdə müəyyən həqiqət vardır. Günlərin
birində dünyaya göz açırıq. Valideynlərimizi özümüz seçmirik. Dünyanın əşrəfi
olan insanlardan ikisi - kişi və qadın bizə həyat verir.
Təəccüblə
ona görə yaşayırıq ki, həyat, dünya bizim üçün sirli aləmdir. Ona bələd olmağa
ha çalışırıq, bilmədiklərimiz bildiklərimizdən qat-qat çox olur. Daim mübarizədə,
fəaliyyətdəyik. Oxuyuruq, işləyirik, axtarırıq, ziddiyyətlərlə üzləşirik. Bəzi
insanların bir-birinə niyə qənim kəsildiyini heç cür anlaya bilmirik. Əgər bu
dünyada müvəqqəti qonağıqsa, yaxşını qoyub pisdən, xeyirxahlığı unudub bədxahlıqdan,
sadəliyi üstün tutmayıb lovğalıqdan, xudbinlikdən, sülhü seçməyib hərbdən
yapışmağın mənası varmı?
Həsrət içərisində ona görə ölürük ki,
dünyadan, yaşayışdan doymaq, doğmalardan ayrılmaq, övladları qoyub getmək
olmur. Lakin bu da bir həqiqətdir ki, ona verilmiş ömür payının az, yaxud
çoxluğundan asılı olmayaraq, həyatda öz yerini tapan, ailə və cəmiyyət
qarşısında öz məsuliyyətini anlayan, heç kimin xatırlatmasını gözləmədən öz
insanlıq, valideynlik, vəzifə borjunu yerinə yetirən, bu dünyadan köçərkən də
rahat nəfəs alaraq: “Mən Allah-taalanın, ulu peyğəmbərimizin (s.ə.s) buyurduğu,
insanlığın tələb etdiyi kimi yaşadım. Əlvida, həyat, əlvida, doğmalarım, əzizlərim.
Əlvida dünya!!!”.
Atam Nurağa müəllim barədə düşünəndə ilk
növbədə onun nurlu çöhrəsi, ağıllı gözləri yadıma düşür. Ömrünün son günlərində
arıqlamış, gözləri çuxura düşmüşdü. Lakin o gözlərdəki nur, yaşamaq eşqi
azalmamışdı. Nurağa müəllim qəlbindəki ən gözəl hissləri əməllərində yaşadan
insan idi. Bütün övladlar kimi, mən də atam haqqında istər danışanda, istərsə də
yazanda kövrəlməyə bilmirəm, qəhər məni boğur.
Təhsilə, elmə məni həvəsləndirən hamıdan çox
o olub. 7 övladının (altı oğul, bir qız) beşi onun yolunu seçib - müəllim peşəsinə
yiyələnib.
Əli Bayramlı şəhərində (ötən əsrin 60-cı illərinin
əvvəllərinə qədər rayon) maarif işığını yandıranlardan, məktəb quruculuğunun fəallarından
biri olub.
Əli Bayramlı ziyalılarından söz açılanda,
Şirvan şəhərinin 60 illiyi ərəfəsində bu böyük sənaye şəhərinin adlı-sanlı,
nüfuzlu, qabaqcıl və təcrübəli müəllimini əlamətdar günlərdə anmamaq ədalətsizlik
olar.
Atamın yubileyi ilə əlaqədar yazı hazırlamağı
alim dostlarımdan hər hansı birindən xahiş edə bilərdim. Lakin həm onun
pedaqoji fəaliyyətinə və həyatına az-çox bələd olan bir şəxs kimi, həm də
atamdan dərs aldığım (o, Əli Bayramlı şəhər 2 nömrəli məktəbdə mənə dərs
demişdi) üçün bu vəzifəni öz üzərimə götürməyi qərara aldım.
Nurağa Nuralı oğlu Abasovun 1911-ci ildə
Navahı kəndində (hazırda Hacıqabul rayonuna baxır) kəndli ailəsində dünyaya göz
açmışdı. Atası Nuralı kişi sadə, zəhmətkeş, halal əməyi hər şeydən uca tutan
bir şəxs idi. Özü təhsil görməsə də, övladlarının savadlanmasını istərdi. Nurağa
atasının arzularını həyata keçirmək üçün gecə-gündüz kitabı əlindən yerə
qoymazdı. Əzbərləməklə arası yox idi. Təcrübədən keçirmiş və anlamışdı ki, hər
hansı mətni can-dərdi əzbərləyib yadda saxlamağın ömrü qısa olur. Odur ki,
oxuduqlarını qavramağa, dərk etməyə çalışırdı. Buna da möhkəm yəqinlik hasil
etmişdi ki, şüurlu öyrənilənlər uzun müddət hafizədə qalır. İllər sezilmədən gəlib keçdi. N. Abasov
Salyanda pedaqoji texnikumu (1937) və ikiillik Müəllimlər İnstitutunun tarix
fakültəsini bitirdi. Əli Bayramlı rayonunda yaşamağa və müxtəlif kəndlərində
(Muğangəncəli, Güdəcühür, Axtaçı və s.) müəllimlik etməyə başladı.
Mircəfər Bağırovun qılıncının dalı da, qabağı
da kəsən illərdə Əli Bayramlı rayon partiya komitəsi təbliğat və təşviqat şöbəsinin
müdiri vəzifəsində çalışdı (1941-1948), Azərbaycan Dövlət Universitetinin
(hazırkı BDU) tarix fakültəsini (1956) bitirdi.
Müxtəlif illərdə Əli Bayramlı Xalq Maarif şöbəsinin
inspektoru (1948-1959), Güdəcühür (1950-1959), Axtacı kənd məktəblərinin, Əli
Bayramlı şəhər 3 nömrəli məktəbin (1962-1971) direktoru oldu, şəhər 1, 2, 14
nömrəli məktəblərində tarix fənnini tədris etdi. Qeyd etdiyim kimi, mən Əli
Bayramlı şəhər N. Nərimanov adına 2 nömrəli məktəbində oxuyarkən atam mənə dərs
demişdi. Etiraf edim ki, o, yaxşı dərs aparır, şagirdlərdə fənnə maraq oyatmağı
bacarırdı. O zamanlar təkcə mən yox, sinif yoldaşlarım da həvəslə Nurağa müəllimin
dediklərini dinlər, ayrı-ayrı mövzuları öyrənməyə çalışardıq. Atamın bir adəti
vardı: materialı şagirdlərə mənimsətmədən digər mövzuya keçməzdi.
İndi
o illəri xatırlayır, onun keçdiyi dərsləri, mənimlə evdəki söhbətlərini yada
salır və bu günkü ağlımla onları təhlil süzgəcindən keçirir və görürəm ki,
Nurağa müəllim hazırda ümumtəhsil məktəbi, təhsil sistemi üçün önəmli sayılan məsələlərin
bəzilərinə hələ o vaxtlar - ötən əsrin 60-cı illərində diqqət yetirirmiş. Ateizm
tərbiyəsinin tüğyan etdiyi illərdə dərsdə islam dəyərlərini, Həzrəti Məhəmməd
peyğəmbərin (s.ə.s) hədislərini yada salırdı. Onda ərəb dilində yazılmış, vərəqləri
saralmış, neçə onillliklərdən qalma “Quran” kitabı vardı, mən Xarici Dillər
İnstitutunun ingilis-Azərbaycan dilləri fakültəsini, institutun nəzdindəki
xarici dilləri öyrənən ikiillik kursun ərəb dili şöbəsini bitirəndən sonra həmin
müqəddəs kitabı mənə verib: “Ulu peyğəmbərimizin (s.ə.s) yadigarıdır. Oxu,
anlayıb, əməl etməyə çalış”, - dedi. “Qurani-Kərim”in həmin nüsxəsi artıq 50 ilə
yaxındır ki, məndədir. Həyat yolumun nurlu müşayiətçisi, kitab rəfimin ən qiymətli
incilərindən sayılır.
Nurağa Abasov tarixdən keçilən mövzuları yerli
diyarşünaslıq materialları ilə əlaqələndirməyi, tədris ekskursiyalarına yer
ayırmağı xoşlardı. Doğma diyara dair şagirdlər tərəfindən toplanmış
materiallardan dərslərdə geniş istifadə olunurdu.
İş təcrübəsində mühüm əhəmiyyət verdiyi məsələlərdən
biri də fənlərarası və fəndaxili əlaqə idi. Bəzi tarix müəllimlərindən fərqli
olaraq, dərsliklərdə yazılanları olduğu kimi məktəblilərə çatdırmazdı, tədris
materiallarına, mövzulara yaradıcı yanaşmağı xoşlar və mən deyərdim ki, bəzən hətta
riskə gedərdi. Mən və mənim yaşıdlarım hələ ötən əsrin 60-jı illərində dərsdə
Nurağa müəllimdən ilk dəfə eşitmişdik ki, tarix kitablarında bu qədər təriflənən,
bir hökmdar və şəxsiyyət kimi göylərə qaldırılan I Pyotr türklərə münasibətdə məkrli
siyasət yeritmiş, türk torpaqlarına göz dikmişdi. I Pyotrun “Rusiya o zaman
dünyəvi dövlət ola bilər ki, Konstantinopol onun paytaxtı olsun” sözlərini də
bizə Nurağa müəllim çatdırmışdı. “Konstantinopol” deyiləndə İstanbul nəzərdə
tutulurdu. Məndə hələ o vaxtdan I Pyotrun şəxsiyyətinə inamsızlıq yaranmışdı. Həmin
zamanlar türkləri tərifləmək cəsarət tələb edirdi. SSRİ sosialist ölkəsi,
Türkiyə kapitalist dövləti və həm də NATO-nun üzvü idi. SSRİ-də kapitalizmə
nifrət formalaşdırılırdı. Nurağa müəllim ehtiyatla bizim türklərlə
bağlılığımızı yada salır, azərbaycanlı adının bizə sonradan verildini bildirirdi.
Həmin illəri xatırlayanda onun necə risk etdiyini görür və bunu yüksək qiymətləndirirəm.
“Pantürkizm”, “panislamizm” adı altında 30-cu illərdə və sonralar nə qədər
ziyalılarımız məhşər ayağına çəkilmiş, sürgünlərə, gedər-gəlməzə göndərilmişdi.
N. Abasov rus-türk müharibələrindən danışarkən da tam çılpaqlığı ilə olmasa da
nitqində, münasibətində türklərə rəğbətini ifadə edərdi.
Tarix
kursu üzrə müvafiq mövzuları ədəbiyyat fənnindəki materiallarla əlaqələndirirdi.
Bizim bu gün də ağız dolusu təriflədiyimiz
V. Şekspirin “Otello” faciəsini yada salır, burada türklərin təhqirə məruz
qaldığına işarə edərdi. Göstərirdi ki, Kipr adasında türklərin məğlubiyyəti əsərdə
şadyanalıqla qarşılanır. Diqqəti aşağıdakı sətirlərə yönəldərdi.
“İndi qərq oldu yəqin turklər…”
“Çatdı hərbin sonu, azğın ləpələr
Türklərə
yaxşıca toy tutmuşdur”
“Düşmənin
qüvvəsi məhv olduğuna
Türk
donanması tələf olduğuna
Görə
şənlik edəcək, əylənəcək,
Hər
kəsin haqqı bu gün əylənmək!”
Belə misralara tez-tez “Otello” faciəsində
rast gəlindiyini deyər və bunu da əlavə edərdi ki, çox təəssüf ki, tamaşaya
baxanda türklərə münasibətə fikir
vermirik, diqqətimizi Otello-Dezdemona-Yaqo-Kassio münasibətlərinə yönəldirik!
Ötən
əsrin təxminən 90-ı illərinə qədər Azərbaycan Demokratik Respublikası, onun
liderləri barədə danışmaq qeyri-mümkün idi. Belə işıqlı tarixi zaman-zaman bizə
unutdurmuşdular. Hətta tarix müəllimlərinin özlərinin belə, həmin dövr barədə məlumatları
az idi.
Nurağa
müəllim yaşlı, təcrübəli, müəllim, köhnə partiya işçisi, tarixin bilicisi kimi
məlumatı olduqlarından söz açardı. Lakin bu dəfə dərsdə deyil, evdə. Mənimlə
söhbətində bir dəfə dedi: “Oğul, sən 28 mayda anadan olmusan. Bilirsən həmin
ayın, həmin günündə hansı hadisə baş verib?” Mən, təbii ki, məlumatsız olduğumu
bildirdim. O, ağır-ağır və kədərlə: “Haradan biləsən?!” - dedi. -”Bu haqda nə yazırlar, nə də danışmağı
qoyurlar. 1918-ci ilin may ayının 28-də bizdə müstəqil respublika qurulub - Azərbaycan
Demokratik Cümhuriyyəti. Hökumətin başında Məmməd Əmin Rəsulzadə, Fətəli xan
Xoyski və başqaları dayanıblar. Müstəqil dövlətimizin ömrü az olub – cəmi 23
ay”. Hər il may ayının 28-də sənin ad gününü qeyd edirik. Həmişə ürəyimdə
dolandırmışam (dilimə gətirməsəm də, çünki başağrısı çox olar, özümdən
qorxmuram, ailəm əziyyət çəkər ki, bu gün iki hadisəni qeyd edirik: müstəqil
respublikamızın, bir də oğlumun ad gününü! Bu gün sizə SSRİ tarixi keçirik.
Əslində SSRİ-nin yox, Rusiyanın tarixini öyrədirik. Müttəfiq respublikalar, o
cümlədən Azərbaycan tarixi barədə Sizə az məlumat veririk. Çox zaman da təhrif
olunmuş şəkildə. Guya biz Rusiyaya könüllü birləşmişik. Sanki xalqımızın çox
hissəsi Arazın o tayında qalmayıb. Bundan xəbərimiz var. Amma dillənə bilmirik.
Dərimizi boğazımızdan çıxararlar. Gənc nəsildən əsil həqiqəti gizlətmək məcburiyyətindəyik.
Bunları sənə deməklə, gözünü açmaq istəyirəm. Amma ehtiyatlı ol. Hər şeyin öz məqamı
var. “Burada Abdulla Şaiqin sözləri yadıma düşdü: “Milli vicdan mili məktəblərdə
doğar… Çocuqlara özünü tanıdan, mili hisslərini, ruhlarını yüksəldən, onların
dağ çeşmələri qədər saf və təmiz ürəklərində
böyük bir məfkurə doğuran, gələcəkdə sevgili vətəni üçün ən dəyərli
övlad yetişdirən və sarsılmaz bir qüvvə hazırlayan məktəbdir… Müəllim sinfin
ruhudur. Çalışqan və vicdanlı bir müəllimin sinifdə nə kimi xarüqələr yarada
biləcəyi aşkardır”.
Nurağa müəllim öz pedaqoji fəaliyyəti
dövründə məhz belə müəllim olmağa, rəhbərlik etdiyi məktəbdə məhz belə atmosfer
formalaşdırmağa çalışardı. Mən bunun canlı şahidiyəm. Nurağa müəllimin ara-sıra
dərsdə bəzi gizli mətləblərə toxunması barədə 2 saylı məktəbin o vaxtkı
direktoru nüfuzlu şəxs, yaxşı müəllim və məktəb işinin gözəl bilicisi Gülbala
Əliyevə də çatmışdı. Bir dəfə atamı yanına çağırıb: “Ehtiyatlı ol, ay kişi! KQB
atamızı yandırar. Nəyinə lazımdır?” - deyə
onu xəbərdarlıq etmişdi. Lakin yaxşı ki, pedaqoji kollektiv, şagirdlər,
valideynlər Nurağa müəllimi sevdiyindən onun söylədiklərini təhlükəsizlik
orqanlarına çatdırmırdılar.
Əli Bayramlı (Şirvan) şəhər 2 nömrəli məktəbdə
bir neçə il işlədikdən sonra Nurağa Abasovu şəhər 3 nömrəli məktəbə direktor təyin
etdilər. Burada o, məktəb işini, pedaqoji prosesi və tədris müəssisəsinə rəhbərliyi,
onun idarə olunmasını yaxşı bildiyini nümayiş edirdi. Məktəbdə sağlam pedaqoji
kollektiv formalaşdırdı. Tədris prosesinin səmərəli qurulması ilə yanaşı, məktəblilərin
asudə vaxtının şən, mənalı və məzmunlu keçirilməsi qayğısına qaldı.
2 nömrəli orta məktəbdə oxuduğum illərdə
atam məni də rəhbərlik etdiyi tədris müəssisəsinin tədbirlərinə cəlb edərdi. Həmin
məktəbin şagirdləri ilə bir neçə dəfə kütləvi tədbirlərdə iştirak etdim. Bakıda
Gənc Tamaşaçılar Teatrının səhnəsində “Əlvida, Hindistan” və b. tamaşalara
baxdıq. Pirsaatdakı (Hacıqabul rayonu) Pirxanagahda olduq.
Əli
Bayramlı şəhər 3 nömrəli məktəb 60-cı illərdə Bakıdakı A.S. Puşkin adına 23
nömrəli məktəblə dostluq əlaqəsi
saxlayır, bu iki tədris müəssisəsinin bir qrup müəllimi və şagirdi bir-birinin
məktəbində olurdu. Belə tədbirlərin birində mən də iştirak etmişdim. 3 nömrəli
məktəb tədris müəssisəsinin həyətyanı sahəsində yetişdirdiyi meyvə payını
Bakıya gətirərdi. Məktəblər təcrübə mübadiləsi edər, görüşər, konfranslar, dəyirmi
stol ətrafında məsləhətləşmələr keçirər, şagirdlər də öz müvəffəqiyyətlərindən
bir-birinə danışar, məktublaşardılar.
1975-ci
ilin aprelində mən müsabiqə yolu ilə Azərbaycan ETPEİ-yə (hazırki Respublika Təhsil
İnstitutu) kiçik elmi işçi vəzifəsinə qəbul
olunandan bir müddət sonra atam institutumuza gəlmişdi. O zaman artıq təqaüddə
idi. Məqsədi həm məni görmək, həm də yeni iş yerim və elmi əməkdaşlarla tanış
olmaqdı. Mən tərbiyənin ümumi problemləri şöbəsində çalışırdım. Nurağa müəllim
şöbə işçiləri ilə bərabər xalq pedaqogikasının mahir bilicisi, mərhum professor
Əliheydər Həşimovla da görüşüb söhbət etdi. Atam Əli Bayramlıya qayıdandan
sonra professor mənə dedi: “Müəllim peşəsinə, dərsdə müəllimin vəzifələrinə,
roluna, məktəbə rəhbərlik və onun idarə edilməsinə dair atanın yaxşı ideyaları
var. Bəzilərini yazıb götürdüm. O, uzaqgörənliklə fikir yürüdür”.
Akademik Mehdi Mehdizadə maarif naziri vəzifəsindən
çıxandan sonra bizim institutda elmi məsləhətçi vəzifəsinə götürülmüşdü.
İnstitutda elmi seminarlar təşkil edərdi. Atam Mehdi müəllimlə tanış olduğunu mənə
demişdi. Bir dəfə bu barədə akademikə danışdım. Nurağa müəllim artıq vəfat
etmişdi. 80-ci illərin əvvəlləri idi. Mehdi müəllim ani fikrə gedib xatırlamağa
çalışdı və mən onun yaddaşına heyran oldum. Dərhal “3 nömrəli məktəbin
direktoru işləyirdi?” - deyə soruşdu. Mənim
müsbət cavabımdan sonra mərhum akademik dedi: “Hə, Nurağa müəllim yaxşı
pedaqoq, məktəb təşkilatçısı idi. Respublika tədbirlərinin bir neçəsində onunla
söhbətlərim olub. Belə adamlar məktəb üçün, şagirdləri vətəndaş, əsl Vətən
övladı kimi yetişdirmək üçün doğulur. Xəbərim var: hələ 30-cu illərdə o, Əli
Bayramlı rayonunda əhali arasında savadsızlığın ləğvi ilə bağlı çox iş görüb.
Neçə-neçə məktəbdə direktor və müəllim işləyib. Tarixən özünü maarif işinə həsr
edən ziyalılarımız çox olub. Onların sırasında Nurağa müəllimi də görmüşəm”. Nurağa Abasov öz fəaliyyətini təkcə pedaqoji
işlə, müəllimliklə məhdudlaşdırmamış, Əli Bayramlının ictimai-siyasi həyatında,
mədəni tədbirlərində yaxından iştirak etmişdi. O, 1941-1948-ci illərdə rayon
partiya komitəsinin şöbə müdiri vəzifəsində çalışarkən əhali arasında səmərəli
təbliğat və təşviqat işi aparırdı. Kənd təsərrüfatı (o cümlədən pambıq) məhsullarının
toplanması, vaxtında dövlətə təhvil verilməsi işinin təşkilində fərqlənirdi.
İkinci cahan savaşında arxa cəbhədə gənclər və əhali arasında vətənpərvərlik
hisslərinin qüvvətlənməsi, orduya maddi və mənəvi köməyin təşkilində yaxından
iştirak edir, gecəsini gündüzünə qatırdı. Sonralar müəllim və direktor işlədiyi
illərdə də şəhərin ictimai-mədəni həyatında iştirakı diqqətəlayiq idi.
Nurağa müəllim müharibə illərindəki və pedaqoji sahədəki fəaliyyətinə
görə çoxsaylı fəxri fərmanlara və medallara layiq görülmüşdü.
Əli Bayramlı Şəhər Xalq Maarifi Şöbəsindən
respublikanın əməkdar müəllimi fəxri
adına təqdim olunmuş, lakin bu adı ala bilməmişdi. Şəhərdəki vəzifə
sahiblərindən biri ilə münasibəti yaxşı deyildi, ona əyilmirdi. Odur ki, təqdimat
Maarif Nazirliyinə yola salınarkən adı siyahıdan çıxarılmışdı.
Nurağa
Abasov ailəcanlı idi. Bizi yaxşı tərbiyə etmək, bizə təhsil vermək istəyirdi.
Onun nəsihətləri bu günə kimi yaddaşımdadır və imkanım daxilində onlara əməl
etməyə çalışıram. Nurağa müəllim deyərdi: “Heç kimin qismətinə göz dikmə. Mərdimazar
olma. Çalış hamıya yaxşılıq elə, amma özünü də unutma. Bəzən yaxşılıq etdiyin
adamdan pislik görürsən. Bunu özünə dərd eləmə. Həyatdır. Hərə bir cür tərbiyə
alıb. Nəticə çıxar. Belə deyiblər: filankəs pisliyindən əl götürmür, mən niyə
yaxşılığımdan əl çəkim. Ailəcanlı ol. Ailə həyatında hövsələ və güzəştəgetmə əsasdır.
Yaxşılıq et, sən xeyrini görməsən də, bir vaxt övladın bunun xeyrini görər.
Onda oğlun, qızın fikirləşəcək: atam yaxşı adam olub. Pislik də belədir. Özünə
də olmasa, xətəri övladına toxuna bilər. Tamahkarlıqdan, adam incitməkdən uzaq
ol. Onlar yalnız və yalnız bədbəxtlik gətirir. Pula aldanma. Vəzifə dalınca
düşmə, vəzifədə olsan, xasiyyətini dəyişmə, dostlardan üz döndərmə, tabeliyində
olanları incitmə, yoxsa bir vaxt vəzifədən düşəndə xəcalət çəkərsən, insanlar səni
görəndə dindirməzlər. İnsan kamala elmlə, oxumaqla, mütaliə etməklə, öyrənməklə
çatar. İnsanlarla rəftar və ünsiyyətinə fikir ver. Bunlar mədəniyyətin yaxşı
göstəriciləridir”.
Nurağa
Abasov vur-tut 64 il yaşadı, 1975-ci ildə dünyasını dəyişdi. Ömür qısa oldusa
da, mənalı yaşandı. Gənc nəslə örnək oldu bu həyat, onlar üçün yaşandı, onların
xoşbəxtliyi üçün də sərf edildi.
Belə
mənalı ömür sahiblərini yad etmək, onların ruhuna hörmət və ehtiram olardı.
Mənbə:
https://www.facebook.com/akif.abbasov.35