Bu yazı Seyidağa Miron
oğlu Onullahinin anadan olmasının 97-ci ildönümünə ithaf edilir.
“Sağlığında xalqın
sevimlisi olmaq, öləndən sonra isə tarixdə silinməz iz qoymaq dünyada ən böyük
səadətdir” (Mirzə Fətəli Axundov).
Ağılla
bilik sağ və sol əl kimidir. Onlar birləşəndə məqsədə tez çatmaq olar. Buna görə
də bütün əsrlərdə ağıllı, bilikli, istedadlı alimlərə ehtiyac hava, su, çörək qədər
zəruri sayılmışdır.
İkiyə bölünmüş Azərbaycan
tarixinin araşdırılması dövrümüzün ən gərəkli işlərindən biridir. Bu yazıda
görkəmli Azərbaycan tarixçisi, tarix elmləri doktoru, professor, ən sevimli müəllimim
və ustadım mərhum Seyidağa Onullahi haqqında;
onun millət,Vətən təəssübkeşliyi barədə söhbət açmaq istəyirəm.
Onunla
olan söhbətlərim artıq xoş xatirəyə dönüb. Olduqca həlim, astagəl, həm də
inadlı, inamlı səsi və çox maraqlı gülüşü vardı. Öz sahəsinin ustad bilicisi
idi. Azərbaycan tarixinə, mədəniyyətinə, dövlətçiliyinə münasibətdə hədsiz məsuliyyətli
idi. Alim yaradıcılığının mənasını Azərbaycana ardıcıl, tükənməyən sevgidə
görürdü.
Təəssüf
ki, millətinin, xalqının xeyrinə iş görən insanları daim xatırlamaq, onların əməllərinə
sahib durmaq ənənələrimiz hələ istənilən səviyyədə formalaşmayıb.
P.S. Seyidağa
Miron oğlu Onullahi (26 avqust 1925, Cənubi Azərbaycanın Astara şəhəri -1
yanvar 2004, Bakı şəhəri; məzarı Ağstafa rayonundadır) - Tarix üzrə elmlər
doktoru, şərqşünas, professor, Bakı Dövlət Universitetinin “Azərbaycanın Qədim
və Orta Əsrlər tarixi” kefedrasının müdiri (2001-2004-cü illər), 1945-1946-cı
illərdə Cənubi Azərbaycanda milli-azadlıq hərəkatının iştirakçısı, “21 Azər”
medalı ilə təltif edilmişdir. Seyidağa Onullahi fars, ərəb, rus, türk dillərini
bilirdi. 1952-ci ildə Həsən bəy Zərdabi adına Gəncə Pedaqoji İnstitutunun tarix
fakültəsini bitirib. 6 il Ağstafada məktəb direktoru işləyib. 1958-ci ildə
Belarus Dövlət Universitetinin şərqşünaslıq fakültəsinin aspiranturasına daxil
olub. 1962-ci ildən Azərbaycan SSR EA Tarix İnstitutunun “Orta Əsrlər Tarixi”
şöbəsində kiçik, baş və aparıcı elmi işçi vəzifələrində çalışmışdır. 1963-cü
ildə namizədlik, 1983-cü ildə doktorluq dissertasiyası müdafiə etmişdir.1985-ci
ildə professor adına layiq görülmüşdür. O, bir neçə monoqrafiyanın və 100-dən
çox elmi məqalələrin müəllifi olmuşdur.
“Təbriz şəhərinin
tarixi” (1982), “İran fəhlələrinin tətil hərəkatı: 1951-1953-cü illərdə” (1968)
, “Övliya Çələbi”, “Gəncə tarixi”, “Azərbaycan tarixi”, həmçinin “Azərbaycan
tarixi” çoxcildlik nəşrinin müəlliflərindən biri olmuşdur. Onun “Erməni millətçiləri
və İran” adlı kitabı Londonda və Bakıda çap edilmişdir. Seyidağa Onullahi Azərbaycan
tarixinə dair orta əsrlərə aid bir çox dəyərli mənbələri təhlil etdərək çap
etdirmişdir. S. M. Onullahi Azərbaycan
tarixinə dair dəyərli mənbə olan Məhəmməd Müfid Yəzdinin "Müxtəsəri-Müfid"
əsərini ilk dəfə təhlil etmiş və Təbrizin XVII əsrin sonundakı vəziyyəti
haqqında bu əsərə istinadən maraqlı məlumatlar vermişdi. Qeyd edək ki, bu əsər
Məhəmməd Müfid Yəzdi tərəfindən 1680-ci ildə Lahurda yazılmış və nəşr
olunmamışdır. Bu qaynaqla yanaşı S. M. Onullahi Xondəmirin “Nameyi Nami” əsərinin
Bakı nüsxəsi, Əbülqasim Kaşaninin “Tarix-i Ulcaytu” adlı elxanilər dövünə aid əsəri,
Mahmud Nətənzi və onun “Nəqavət əl-asar fizikr-ül əxyar” əsəri, Fəzli İsfəhaninin
“Əfzəl-ət-təvarix” adlı əsəri, Cəlaləddin Məhəmməd Münəccim Yəzdinin “Tarix-i
Abbasi”adlı əsərinə və Səfəvilər dövləti ilə bağlı bəzi məktublara dair elmi əhəmiyyət
kəsb edən məqalələr nəşr etmişdir. S. Onullahinin tədqiqatlarında Qarabağ da
müstəsna yer tutmuş, bu barədə “Dövrün farsdilli qaynaqlarına istinadən” ”Azərbaycan
Qarabağı”, “Arran Qarabağı”, “ Qarabağ XV-XVII əsrlərdə” adlı məqalələrində
maraqlı və çox qiymətli məlumatları aşkar etmişdir. S. M. Onullahi Təbriz şəhərinin
tarixini ətraflı şəkildə araşdırmışdır. Bu barədə həm 1982-ci ildə tarix elmləri
doktorluğu almaq üçün müdafiə etmiş olduğu fundamental əsəri, həm də Təbriz şəhəri
ilə bağlı silsilə məqalələri məlumdur. Bu məqalələrdə Təbrizin mədəniyyət,
maarif və məktəb tarixindən, Təbriz kitabxanalarından, Təbrizin məhəllələri barədə,
Təbrizdə baş verən zəlzələlər, Səfəvilər dövlətinin paytaxtının Təbrizdən Qəzvinə
köçürülməsi, Xaqani Şirvaninin Təbrizlə bağlılığı, Elxanilər dövründə Təbrizdə
tikilmiş Rəb-i Rəşidi məhəlləsinin tarixi və əhəmiyyəti, Təbriz şəhərindəki abidələr,
o cümlədən də Təbrizin Cahanşah yadigarı hesab edilən 1465-ci ildə tikilmiş Göy
məscidin tarixçəsi və başqa tarixi məsələlər barədə dəyərli məlumatlar vermiş və
araşdırmalar aparmışdır. S. Onullahinin yaradıcılığında Səfəvilər dövləti ilə
bağlı tədqiqatlar da mühüm yer tutur. Səfəvilərin soykökünün türk olması
haqqında təkzibedilməz məlumatları Seyidağa Onullahi tarixi qaynaqlara və
faktlara əsaslanaraq vermişdir. S. Onullahi həm də İran alimlərinin əsərlərində
Azərbaycan dili tarixinin saxtalaşdırılmasına dair fikirlərə münasibət bildirərək
bu barədə məqalələr yazmış və məqalələrində İran alimlərinin mövqeyini ifşa
etmişdir. Bir başqa məqaləsində isə İranda milli məsələnin qoyuluşuna toxunmuş
və göstərmişdir ki, “Ərəb istilasından sоnra XI əsrdən 1925-ci ilə qədər İranda
hakimiyyətdə türkdillilər оlmuşlar. Min il ərzində həmin türkdilli hakimlər
fars dili və irandillilərin mədəniyyətinin inkişafında mühüm rоl оynamışlar”.
Professor Seyidağa Onullahinin qəribə
danışıq tərzi vardı. Səbirli idi, tələsməyi sevmirdi. Öz sahəsinin bilicisi
idi. Azərbaycan tarixinə, mədəniyyətinə, dövlətçiliyinə münasibətdə məsuliyyətli
idi. Alim yaradıcılığının mənasını Azərbaycana sevgidə görürdü. Mirzə Xəzərin
“Azadlıq” radio verilişində Cənubi Azərbaycan
mövzusunda dinləyicini daim düşünməyə məcbur edən çıxışları soydaşlarımızın Vətən
təəssübkeşliyinin yaranmasında əhəmiyyətli rol oynamışdı. Seyidağa Onullahi
kimi araşdırmaçıların əməlləri öyrənilməli, sabahımız üçün yaşarı olanlar təzə
ömürlərin, aqibətlərin yaradılmasına, yaşadılmasına yönəldilməlidir.
Yaxşı
yadımdadır 1995-ci ildə BDU- da dərs prosesində ondan 1945-46-cı illər inqilabı zamanı nə işlə məşğul olması barədə
soruşdum. Özünə məxsus maraqlı gülüşüylə
cavab verdi:” O vaxt mən gənc idim, yerölçən işləyirdim. Camaata torpaq
paylayırdıq ki, əkib-becərsinlər”. Halbuki biz; onun sevimli tələbələri müəllimimizin
həyatı haqqında hər şeylə maraqlanırdıq. Bunu özü də bilirdi. Dərs zamanı kənar suallar verilməsini xoşlamazdı. Həmişə
deyərdi: “Şəxsimlə bağlı suallarınız varsa, dərsdən sonra gəlin, bütün
suallarınıza cavab verim”.
Bir gün, 1996-cı ildə, BDU -nun tarix fakültəsi;
ixtisas: “Azərbaycanın Qədim və Orta əsrlər tarixi”, “Azərbaycan və Qızıl Orda “ mövzusu üzrə
diplom işi seçdim. Ustadım Seyidağa Onullahi
mənə söylədi:“ Sənin yerinə olsaydım, XIII- XVII əsr Azərbaycan maarifi mövzusunu seçərdim”. Dedim ki; ”Seyidağa müəllim
bu mövzu mənim üçün çətin mövzudur. Həm də mövzuya uyğun mənbələri tapmaq çətin olacaqdır”. “Özün bilərsən, seçim sənindir” - dedi: Mən diplom
üşüm üçün “Azərbaycan və Qızıl Orda“ mövzusunu seçdim. Seyidağa müəllim mənim elmi rəhbərim yox, “ opponent”im (diplom
müdafiəsi zamanı “qarşı tərəf ) oldu. Diplom işini yazarkən dəfələrlə onun evinə, məsləhətə
getmişəm. Evində çox böyük kitabxanası var idi. Ayrıca bir otaq kitabxana idi. Stolunun
üstündəki, qırmızı rəngli radio - maqnitafon heç vaxt yadımdan çıxmaz. ...1996-cı ilin may ayı
idi. Onun evinə getdim. Qapını açdı. Evə daxil oldum (Azadlıq radiosunda Cənubi
Azərbaycan haqqında Mirzə Xəzərin məlumatına
qulaq asırdı). Mənə oturmağı təklif etdi. Sakitcə məlumata qulaq asdıq, veriliş
qurtardıqdan sonra radionu söndürdü və mənə
baxdı. Mən o dəqiqə: “Diplom işimi gətirdim ki, Sizə göstərim Seyidağa müəllim,
özünün demişdiniz” söylədim. Diplom işimə baxmağa başladı..... Baxdıqca,
kitabxanasına keçir və oradan gətirdiyi kitabları stolun üstünə düzürdü. Əvvəlcə
mən heç nə başa düşmədim. Sonra maraqlı gülüşüylə mənə dedi: ”Hə Seyyub, indi
yoxlayaq görək, yazdığın sitatlar doğrudur ya yox”. Diplom işimdəki (o vaxtlar əlyazma
ilə yazıırdıq) hər bir səhifədəki sitatları (göstərdiyim mənbə və səhifəsinədək)
yoxladı (Qeyd edim ki, diplom işinin “Giriş” hissəsində yazdığım;- ” Öyrənilən
dövr üçün S. Onullahinin 1982-ci ildə nəşr edilmiş “XIII-XVII əsrlərdə Təbriz şəhərinin
tarixi” əsəri olduqca maraqlıdır. Əsər bu dövrlərin ictimai-iqtisadi və eləcədə
siyasi tarixini öyrənmək baxımından xüsusilə əhəmiyyətlidir. Əsərdə
qızılordalılara qarşı Azərbaycan xalqının mübarızəsi məsələləri olduqca dolğun
və düzgün işıqlandırılmışdır. Müəllif əsəri yazarkən 1338 müxtəlifdilli mənbə və
ədəbiyyatdan istifadə etmişdir”). Özünəməxsus gülüşlə - “Sən mənim kitabımda bütün bunları saymısan? dedi. Qeyri-ixtiyari:
”Bəli, müəllim!” dedim. Özünəməxsus gülüşlə “Əla yazmısan” dedi. Makinada mənim üçün rəy yazdı. ...
Diplom müdafiəsi günü məni ilk təbrik edən də Seyidağa müəllim
oldu.
Çox təəssüflər
olsun ki, 1996-cı ildən sonra ustad alimlə əlaqə saxlaya bilmədim. İndi o vaxtdan düz 26 il keçir.
Allah sənə qəni-qəni min rəhmət eləsin Ustad!
Sevimli tələbələrin səni heç vaxt unutmaz! Nə qədər ki, Azərbaycan var, Siz də
varsınız! Ruhun şad olsun!
İstifadə edilmiş ədəbiyyat və internet resursları
1.Onullahi S.M. XIII - XVII
əsrlərdə Təbriz şəhəri (Sosial-iqtisadi tarixi). Bakı.1982
2.Onullahi S.M. 1951-1953-cü illərdə İran fəhlələrinin
tətil hərəkatı. Bakı. 1968
3.Evliya Çələbi. Səyahətnamə (Azərbaycan
tarixinə aid seçmələr). Tərcümə edəni S. Onullahi, Bakı. 1997
4.Azərbaycan tarixi.
Yeddi cilddə. Bakı. 1998 - 2003
5.S. M. Onullahi. Erməni millətçiləri və İran.
Bakı. 2002
6.S. M. Onullahi. Azərbaycan tarixinə aid yeni
mənbə “Az. SSR EA Məruzələri”, 1975, № 4
7.S. M. Onullahi. Elxanilər dövrünə aid
istifadə edilməmiş mənbə. “Az. SSR EA Məruzələri”, XXXII cild, 1976, № 5
8.S. M. Onullahi. Cəlaləddin
Məhəmməd Münəccim Yəzdi və onun “Tarix-i Abbasi” əsəri haqqında. “Az. SSR EA Xəbərləri”,
TFH seriyası, 1972, № 2
9.S. M. Onullahi. Təbriz
kitabxanaları (X–XVII əsrlərdə). (S.M.Kirov adına ADU-nun elmi əsərləri; Şərqşünaslıq
seyiası). 1971, № 1
10. S. M. Onullahi. Təbrizin
maarif və məktəb tarixindən (XIII - XV əsrlər). “Azərbaycan EA Xəbərləri”, TFH
seriyası, 1976, № 4
11.https://az.wikipedia.org/wiki/Seyida%C4%9Fa_Onullahi
12.https://az.wikipedia.org/wiki/%2221_Az%C9%99r%22_medal%C4%B1
13.https://az.wikipedia.org/wiki/Fayl:Seyida%C4%9Fa_Onullahi.jpg
14.http://lib.az/persons/1
15.https://azerbaycan-ruznamesi.org/2021/01/29/f%C9%99dai-alim-yenilm%C9%99z-insan-seyidaga-onullahi/
16.http://www.anl.az/down/meqale/edebiyyat/2013/dekabr/344910.htm
17.https://ru.wikipedia.org/wiki/Онуллахи,_Сеидага_Миронович
Hazırladı:
Əsədov Seyyub Əsəd oğlu - Şirvan şəhər T.
Bağırov adına 11 №-li tam orta məktəbin tarix müəllimi, “Ən yaxşı müəllim”
müsabiqəsinin (2015-ci il), “Elektron Təhsil” Respublika Müsabiqəsi, “Təhsildə ən
yaxşı İnternet resursları” nominasiyası qalibi (2017-ci il), Respublika
“Pedaqoji Mühazirələr”inin (2003-cü il III dərəcəli Diplom və 2019-cu il Tərifnamə)
təltifçisi, Təhsildə inkişaf və innovasiyalar üzrə IV qrant müsabiqəsinin
(2020) qalibi (“V-XI siniflərdə tarix fənninin tədrisi metodikası” adlı metodik
vəsait müəllifi), Azərbaycan Respublikası “Təhsil Şurası” İB-nin İdarə Heyətinin
üzvü
Daha ətraflı:
https://multiurok.ru/files/az-rbaycan-tarixinin-ustad-bilicisi-tarixci-alim-p.html